ഐ.വി. ശശിയുടെ ശിഷ്യനായ ജോമോന്റെ ആദ്യ ചിത്രമായിരുന്നു മമ്മൂട്ടി നായകനായ സാമ്രാജ്യം. സൂപ്പർഹിറ്റായ ചിത്രം അധോലോക രാജാക്കന്മാരുടെ കുടിപ്പകയുടെ കഥയാണ് പറഞ്ഞത്. പ്രേക്ഷകരെ ത്രസിപ്പിക്കുന്ന അണ്ടർവേൾഡ് കഥയ്ക്കൊപ്പം ഹൃദയസ്പർശിയായ ബന്ധങ്ങളുടെ അടിത്തറ ചിത്രത്തെ പ്രേക്ഷകരുമായി ചേർത്തുനിർത്തി. അതിനാൽ ഭാഷാഭേദമില്ലാതെ ഇന്ത്യൻ ഭാഷകളിൽ ചിത്രം മൊഴിമാറ്റം ചെയ്യപ്പെട്ടു. ഇപ്പോഴിതാ ചിത്രം റീ റിലീസിന് ഒരുങ്ങുകയാണ്. പുതിയ ദൃശ്യവിസ്മയത്തിൻ്റെ കാഴ്ച്ചാനുഭവവുമായി 4k ഡോൾബി അറ്റ്മോസ് പതിപ്പിൽ സെപ്റ്റർ മാസത്തിൽ റീ റിലീസ് ചെയ്യുകയാണ്.

1990 ജൂണ്‍ 22-ല്‍ റിലീസ് ചെയ്ത ചിത്രം കേരളത്തില്‍ മാത്രമല്ല, ആന്ധ്രാപ്രദേശിലും ആ വര്‍ഷത്തെ ഹിറ്റ് ചാര്‍ട്ടിലാണ് ഇടംപിടിച്ചത്. കേരളത്തില്‍ സാമ്രാജ്യം തീയേറ്ററുകള്‍ കീഴടക്കിയത് 200 ദിവസമാണെങ്കില്‍ ഡബ്ബ് ചെയ്ത് തെലുങ്കിലേയ്ക്ക് എത്തിയ ചിത്രം 600 ദിവസമാണ് നിറഞ്ഞ സദസിന് മുന്നില്‍ ഓടിയത്. തെലുങ്കില്‍ ഏറ്റവും കൂടുതല്‍ ദിവസം പ്രദര്‍ശിപ്പിച്ച മലയാള ചിത്രം എന്ന് റെക്കോഡും അതോടെ സാമ്രാജ്യം സ്വന്തമാക്കി.

മമ്മൂട്ടി, മധു, വിജയരാഘവന്‍, ശ്രീവിദ്യ, ക്യാപ്റ്റന്‍ രാജു, ബാലമന്‍ കെ നായര്‍, പ്രതാപചന്ദ്രന്‍, ഭീമന്‍ രഘു എന്നിങ്ങനെ മലയാളത്തിലെ അതുല്യ പ്രതിഭകള്‍ അണിനിരന്ന ചിത്രത്തിന്റെ തിരക്കഥ ഒരുക്കിയത് ഷിബു ചക്രവര്‍ത്തിയായിരുന്നു. ഇന്നും മമ്മൂട്ടി ചിത്രങ്ങളില്‍ സാമ്രാജ്യത്തിൻ്റെ തട്ട് താണുതന്നെയിരിക്കും. ആരിഫാ പ്രൊഡക്ഷൻസിൻ്റെ ബാനറിൽ അജ്മൽ ഹസ്സനാണ് ചിത്രം നിർമ്മിച്ചത്. സ്ലോമോഷൻ ഏറ്റവും ഹൃദ്യമായ രീതിയിൽ അവതരിപ്പിച്ച് ശ്രദ്ധ നേടിയ ചിത്രം കൂടിയായിരുന്നു. ഗാനങ്ങളില്ലാതെ ഇളയരാജ പശ്ചാത്തല സംഗീതം മാത്രമൊരുക്കിയ ഈ ചിത്രത്തിലെ പശ്ചാത്തലസംഗീതം ഈ ചിത്രത്തിൻ്റെ ഏറ്റവും വലിയ ഹൈലൈറ്റുകളിൽ ഒന്നു തന്നെയായിരുന്നു.

അലക്സാണ്ഡർ എന്ന അധോലോക നായകനെയാണ് മമ്മൂട്ടി ഈ ചിത്രത്തിൽ അവതരിപ്പിച്ചത്. നായകസ്ഥാനത്ത് ഏറെ തിളങ്ങി നിൽക്കുന്ന ഒരു നടൻ നെഗറ്റീവ് ഷേഡ് നൽകുന്ന ഒരു കഥപാത്രത്തെ ഉൾക്കൊള്ളാൻ തന്നെ മടികാണിക്കും.ഈ സമയത്താണ് വേഷഭൂഷാദികളാലും അഭിനയ മികവുകൊണ്ടും ഈ കഥാപാത്രത്തെ അനശ്വരമാക്കി അലക്സാണ്ടർ പലരുടേയും സ്വപ്ന കഥാപാത്രമായി മാറിയത്. അക്കാലത്ത് അലക്സാണ്ടർ എന്ന കഥാപാത്രം പ്രേക്ഷകർക്ക് ഏറെ കൗതുകവും ആവേശവുമായി മാറിയത് ആ കഥാപാത്രത്തിൻ്റെ അവതരണത്തിലെ വ്യത്യസ്ഥത തന്നെയായിരുന്നു.ജയനൻ വിൻസൻ്റ് എന്ന ഛായാഗ്രാഹകൻ്റെ സംഭാവനയും ഏറെ വലുതായിരുന്നു.പ്രശസ്ത ഗാന രചയിതാവായ ഷിബു ചക്രവർത്തിയാണ് ഈ ചിത്രത്തിൻ്റെ തിരക്കഥ ഒരുക്കിയത്. എഡിറ്റിംഗ് – ഹരിഹര പുത്രൻ.